04/03/2021.- Asturies, Cultura en Rede ufierta esti mes de marzu propuestes d’artes escéniques, música, lliteratura, artes plástiques y visuales y cultura tradicional en distintos conceyos del Principáu. Esti proyectu de la Conseyería de Cultura, Política Llingüística y Turismu, realizáu en collaboración colos conceyos asturianos, y xestionáu pola Sociedá Pública de Xestión Turística y Cultural del Principáu d’Asturies, busca dar mayor visibilidá a los y les creadores d’Asturies, dinamizar la cultura y vertebrar el territoriu al traviés de diferentes circuitos culturales temáticos.

Nel marcu del circuitu d’artes escéniques va poder vese  Voces de Luz de Gas Teatro nos conceyos de Colunga, Noreña, Llangréu y Carreño; Porno de ACAR Teatro del Mundo en Castrillón,Navia y Llangréu; Retablo de la avaricia, la lujuria y la muerte de Teatro del Norte en Castrillón; Amares de La Sonrisa del Lagarto en Salas; Mujer de Factoría Norte en Llaviana; ¡Ay Carmela! de la compañía De Carmela en L.lena; Cuentos del atardecer de Tragaluz Títeres en Nava; En esa casa pasan cosas de El Callejón del Gato en Colunga; Setiembre d’Arte Producciones José Rico Teatro en Corvera; Si pudiera… de Con Alevosía Teatro en Ribeseya; Llamémoslo X de Luz de Gas Teatro en Villaviciosa; y Nina Cocinamiedos de Mar Rojo Teatro en Piloña.

Va haber música con Maraviyes del Cosmos nel conceyu de Llangréu, con El Arca de Mozart en Nava, con Petip Pop en Cangues d’Onís y con Silvia Quesada en Cangas del Narcea.

La cultura tradicional va tar presente col recital Fundamentos d’Héctor Braga en L.lena, afondando na mitoloxía asturiana con Ponte la mázcara de Aladanza, educación y tradición en Noreña y con los Cuentos, conseyes y marionetes d’Elisabet Martín Teatro en Xixón.

Nel marcu del circuitu de lliteratura va poder disfrutase de los cuentacuentos Lo que me contó la Tía Carola de Carlos Alba Cellero nel conceyu de Ribeseya y en Muros de Nalón y de Puppys en Cangas del Narcea y n’Uviéu. Ellas viajan de Vialibri, un proyectu de dinamización llectora y creación lliteraria, va llegar a Villaviciosa, a Tapia y a Colunga. Ester Sánchez, Premiu Nacional d’Edición en 2008, 2013 y 2014, va esplicar el procesu d’ellaboración d’un poemariu ilustráu en Cabranes, en Noreña, en Carreño y en Xixón y les hermanes Sil y Gema Fernández van ufiertar un espectáculu poético-musical, Animalías e incertidumbre, n’El Franco y n’Uviéu.

Amás, del 27 de marzu p’alantre va poder visitase en Castrillón la Triloxía poética ilustrada Al horru d’Ediciones Pata Negra, una muestra del circuitu d’artes plástiques y visuales integrada por 60 poetas y otros tantos artistes plásticos na que se fai homenaxe esti elementu mueble tan representativu d’Asturies.

A esto súmase la  programación cinematográfica de La Cinemateca Ambulante qu’en marzu ufierta proyecciones en 17 concejos asturianos. Na so cartelera rescampla’l cine de non ficción fechu n’Asturies -con llargumetraxes de cineastes como Ramón Lluís Bande, Elisa Cepedal, Manuel García Postigo o Carlos Navarro- amás de títulos premiaos en grandes festivales internacionales como Josep o Beginning.

La programación d’Asturies, Cultura en Rede pue sufrir modificaciones en función de la evolución de la pandemia por Covid-19. Puen consultase les feches, horarios y la información actualizao en www.asturiesculturaenrede.es.